حضرت فاطمہ زہرا (س) اول سے لے کر آخر تک تمام خواتینِ عالم کی سردار ہیں
حوزہ نیوز ایجنسی کی رپورٹ کے مطابق، حضرت فاطمہ زہرا سلام اللہ علیہا کے یوم شہادت کی مناسبت سے مدرسہ علمیہ حضرت صدیقہ فاطمہ (س) گرگان کی استاد محترمہ عطیہ وحید نے مدرسہ علمیہ حضرت صدیقہ فاطمہ (س) گرگان کی انتظامیہ اور طالبات کے درمیان گفتگو کرتے ہوئے کہا: حضرت فاطمہ زہرا سلام اللہ علیہا جہان کی برتر خواتین میں سے ہیں۔
انہوں نے مزید کہا: روایات کے مطابق حضرت مریم سلام اللہ علیہا اپنے زمانے کی خواتین کی سردار تھی لیکن حضرت فاطمہ زہرا سلام اللہ علیہا آغاز سے لے کر آخر تک تمام خواتینِ عالم کی سردار ہیں۔
اس مدرسے کے استاد نے کہا: حضرت زہرا سلام اللہ علیہا حدیث کساء کا محور و مرکز ہیں اور خداوند عالم نے آیت تطہیر کو آپ، آپ کے باپ، آپ کے شوہر اور آپ کے فرزندوں کی شان میں نازل کیا ہے اور آیۂ مباہلہ میں حضرت زہرا سلام اللہ علیہا کو رسالت میں شریک قرار دیا ہے۔
محترمہ عطیہ وحید نے کہا: پیغمبر اکرم صلی اللہ علیہ وآلہ وسلم نے حضرت زہرا سلام اللہ علیہا کے مقام و منزلت کو بیان کرنے کے لئے انہیں "باپ کی ماں" کے لقب سے نوازا تاکہ دوسروں کو سمجھائیں کہ اگر انبیاء کی بیویاں مومنین کی مائیں ہیں تو حضرت زہرا سلام اللہ علیہا (فضیلت میں) پیغمبر اسلام کی ماں ہیں۔
انہوں نے کہا: حضرت زہرا سلام اللہ علیہا کی ایک اور عظمت ان کا "حجة للحجج" ہونا ہے یعنی ائمہ معصومین علیہم السلام لوگوں پر خدا کی حجت ہیں اور حضرت زہرا سلام اللہ علیہا ائمہ علیہم السلام پر خدا کی حجت ہیں۔
مدرسہ صدیقہ فاطمہ (س) کی استاد نے کہا: حضرت زہرا سلام اللہ علیہا سے توسل بہترین اور سریع الاجابہ توسل ہے۔ بزرگ علماء کی سیرت میں ملتا ہے کہ انہیں جب بھی کسی مشکل اور سختی کا سامنا ہوتا تو وہ حضرت زہرا سلام اللہ علیہا سے توسل کیا کرتے تھے۔
حضرت فاطمہ زہرا (س) تمام معصومین (ع) کے لئے نمونہ عمل ہیں: حجۃ الاسلام ابراہیم جعفری
حوزہ نیوز ایجنسی کی رپورٹ کے مطابق، ایران کے شہر’ برخوار ‘کے سربراہ شعبہ تبلیغ، حجۃ الاسلام ابراہیم جعفری نےایک اجتماع میں حضرت فاطمہ زہرا سلام اللہ علیہا کے ایام شہادت پر تعزیت پیش کرتے ہوئے فرمایا: حضرت زہرا سلام اللہ علیہا کی زندگی نہایت ہی مختصر تھی مگر ثمر آور اور با وقار و با عظمت زندگی تھی جس کا ثمر حفظ قرآن اور حفظ امامت اور ولایت ہے۔
شہر برخوار کے شعبہ تبلیغ کے سربراہ نے مزید کہا: ائمہ معصومین علیہم السلام ہم پر حجت ہیں اور حضرت زہرا سلام اللہ علیہا معصومین پر حجت ہیں۔
انہوں نے مزید کہا: حضرت فاطمہ سلام اللہ علیہا رحمت، عفت، امید اور ولایت کی حفاظت کا سرچشمہ ہیں، اس لیے ضروری ہے کہ تبلیغ کی تمام صلاحیتوں کو بروئے کار لایا جائے، مبلغین، دینی اداروں پر فرض ہے کہ معاشرے میں فاطمی اور علوی طرز زندگی کو بیان کریں اور اس کے لیے پہلے سے زیادہ کوشش کریں۔
حجۃ الاسلام ابراہیم جعفری نے ایام فاطمیہ میں مجالس عزا کے انعقاد کو ضروری قرار دیا اور کہا: ان دنوں میں جب کہ راتیں سال کے دوسرے دنوں کی نسبت لمبی ہوتی ہیں، اہل خانہ قرآن مجید کی تلاوت کے علاوہ ایام فاطمیہ کی مجالس میں شرکت کرتے رہیں، معصومین کی زیدگی کے واقعات اور خاص طور پر حضرت زہرا سلام اللہ علیہا کی قیمتی زندگی کو اپنے بچوں کو سنائیں اور اپنے گھروں کو ان کے نور مبارک سے منور کریں۔