پسِ ابر تھا کہیں ماہ شب کہیں نقشِ مہر سحر نہ تھا / جو نقیبِ صبحِ وفا بنے وہ چراغِ اہلِ نظر نہ تھا
وہ ہجومِ یاس تھا ہر طرف کہ بجھی تھی زیست کی روشنی / لب کم سخن پہ دعا تو تھی مگر اس دعا میں اثر نہ تھا
کہیں حرفِ حق کی صدا نہ تھی، تھے صلیب و دار کے معرکے / جو نشانِ زیست کو پاسکے وہی زندگی کا سفر نہ تھا
کہیں قتل گاہیں تھیں رقص میں، کہیں سولیاں تھیں دھمال میں / بڑی تیز دھوپ تھی دشت میں کوئی راستے میں شجر نہ تھا
کہیں برق ظلم کی تھی چمک، کہیں رعدِ جور کی تھی کڑک / کہ خزاں گی زد میں تھا گلستاں کسی نخلِ جاں پہ ثمر نہ تھا
مگر اب شہیدوں کے خون سے وہ حیات پیر جواں ہوئی / تھی جو نبضِ زیست رکی ہوئی وہ مثال موج رواں ہوئی
کئی سرکٹے، کئی گھر لٹے کئی لوگ جاں سے گزر گئے / کہ عدوے شاخِ نہالِ غم سر سام برقِ تپاں ہوئی
جہاں زور و زر کی تھی بت گری جہاں شور و شر کی تھی بندگی / اسی بُت کدے میں اے جعفری دمِ صبح بانگِ اذاں ہوئی