قائد انقلاب اسلامی: اپنی تمام تر توجہ نوجوانوں کی دینی اور انقلابی تربیت پر مرکوز کریں اور خدا کی راہ میں فعالانہ جہاد کے ساتھ، اخلاق کا عنصر بھی ایجاد اور برقرار ہوجاتا ہے۔
رہبر معظم انقلاب اسلامی، آیت اللہ العظمی سید علی خامنہ ای نے یزد اور ہمدان صوبوں کے ثقافتی اداروں کے عہدے داروں اور اس شعبے میں سرگرم افراد سے ملاقات کی۔ اس موقع پر آپ نے نوجوان نسل میں انقلابی جذبے کی تقویت پر زور دیتے ہوئے فرمایا: شہید محسن حججی [جس کا سر شام میں داعشی ہاتھوں کاٹ دیا گیا] انقلابی فکر کے نمود کی ایک درخشاں مثال ہیں۔
آیت اللہ خامنہ ای نے موجودہ دنیا میں نوجوان نسل کو گمراہ کرنے کی غرض سے وجود میں آنے والے ماحول اور وسائل کی جانب اشارہ کرتے ہوئے فرمایا: اس طرح کے نقصان دہ پروپیگنڈے اور گمراہ کن آوازوں کے مقابلے میں نوجوانوں کی ہدایت و رہنمائی اور ذہنی تربیت کےلئے بھی عظیم گنجائش اور وسائل موجود ہیں۔
قائد انقلاب نے نوجوانوں کی جانب سے دشمنوں کا مقابلہ کرنے کےلئے بے شمار درخواستوں کی جانب اشارہ کرتے ہوئے فرمایا: آج کے بہت سے نوجوان جن کا جذبہ بھرپور اور ایمان بے مثال ہے، اپنی زندگی، گھرانے اور سکون کو قربان کرکے ملک کا دفاع اور دشمنوں کا مقابلہ کرنا چاہتے ہیں اور انقلاب کے ان نئے اور قیمتی نہالوں کی قدر کرنا چاہئے۔
آپ نے انقلابی اور پرجوش جذبے کی تقویت کو ثقافتی شعبے میں سرگرم افراد اور عہدے داروں کا فرض قرار دیتے ہوئے فرمایا: اپنی تمام تر توجہ نوجوانوں کی دینی اور انقلابی تربیت پر مرکوز کریں اور جان لیں کہ انقلابی، دینی جذبے، جہادی رجحان اور خدا کی راہ میں فعالانہ جہاد کے رجحان کی تقویت کے ساتھ ساتھ، اخلاق کا عنصر بھی ایجاد اور برقرار ہوجاتا ہے۔
رہبر انقلاب نے تاکید کی کہ اعلی عہدے داروں کو چاہئے کہ انقلابی طاقت کی عظیم لہر کو جو خوش قسمتی سے نوجوانوں میں پائی جاتی ہے، مستحکم کریں اور ایسے کام نہ کریں کہ یونیورسٹیوں، تعلیمی اداروں اور دینی تبلیغ کے عمل میں انقلابی اور اسلامی جذبے کی مخالف تحریک کو طاقتور ہونے کا موقع ملے۔
http://www.leader.ir