امام حسین علیہ السلام اہل سنت کی روایات میں - 2
تحریر: ساجد محمود
ولادت:
تین شعبان المعظم، سال چہارم ھجرت، آسمان ولایت و امامت کے تیسرے ستارے، باغ رسالت کے پھول، فرزند رسول اللہ امام حسین علیہ السلام کی خاندان وحی و ولایت کے گھرانے میں ولادت ہوئی۔ جیسے ہی امام حسین علیہ السلام کی ولادت کی خبر جناب رسول خدا صلی اللہ علیہ وآلہ وسلم تک پہنچی تو آپ فوراً علی و فاطمہ سلام اللہ علیھما کے گھر تشریف لائے اور اسماء کو کہا میرے فرزند کو میرے پاس لایا جائے۔ اسماء نے امام حسین علیہ السلام کو ایک سفید کپڑے میں لپیٹا اور رسول اللہ کی خدمت میں لے گئیں، رسول اللہ نے امام حسین علیہ کے دائیں کان میں آذان اور بائیں میں اقامت کہی۔ (امالی شیخ طوسی. ج١.ص٣٧٧۔) ولادت کے پہلے دنوں میں یا ولادت کے ساتویں دن جبرائیل آمین آئے اور کہا کہ اے رسول اللہ آپ پر خدا کا درود و سلام ہو۔ خدا چاہتا ہے کہ "سَمّی هارونُ اِبْنَیه شُبَّراً و شُبَیْراً و سَمَّیتُ اِبنّی الحسنَ و الحسینَ بما سَمّی به هارونُ ابنیه" اس فرزند کا نام حضرت ھارون کے چھوٹے بیٹے کے نام "شبیر" جس کا عربی میں معنی "حسین" ہے رکھا جائے۔ (معانی الاخبار، ص٥٧)۔ اس لئے کہ علی کو آپ سے وہی نسبت ہے جو ھارون کو موسی ابن عمران سے ہے، فقط فرق یہ ہے کہ تیرے بعد کوئی نبی نہیں آئے گا۔ لہٰذا امام حسین علیہ السلام وہ با عظمت و با فضیلت شخصیت ہیں کہ جن کا اسم گرامی خود خداوند متعال نے انتخاب فرمایا۔
6۔ امام حسین علیہ السلام کا بلند مقام:
ابن مردویہ نے روایت نقل کی ہے کہ رسول خدا نے ارشاد فرمایا: "فِىْ الْجَنَّةِ دَرَجَةٌ تُدْعَى الْوَسيلَةُ فَاذا سَأَلْتُمُ اللَّهَ فَسْأَلُوا لِىَ الْوَسيلَةَ قالُوْا: يا رَسُولَ اللَّهِ مَنْ يَسْکُنْ مَعَکَ فيها؟ قالَ: عَلِىٌّ وَ فاطِمَةُ وَالْحَسَنُ وَالْحُسَيْنُ" جنت میں ایک مقام ہے جسے وسیلہ کہا جاتا ہے بس جب بھی خدا سے سوال کریں میرے لئے وسیله کا سوال کریں۔ پوچھا گیا یا رسول اللہ! اس مکان میں آپ کے ساتھ کون رہے گا؟ رسول اللہ نے فرمایا: علی و فاطمہ حسن و حسین علیھم السلام۔ (کنز العمال 6/217، اسد الغابه 5/523)۔
7۔ امام حسین علیہ السلام اور رسول اللہ جنت میں ایک مکان میں:
احمد طبرانی و ابن اثیر نے حضرت علی علیہ سے اور حاکم نے مستدرک میں ابی سعید سے روایت نقل کی ہے رسول اللہ نے جناب فاطمہ سلام اللہ علیھا کو فرمایا: "يا فاطِمَةُ، انّى وَ ايّاک، وَ هذا الرَّاقِدَ يَعْنى عَلِيًّا وَ الْحَسَنَ وَ الْحُسينَ يَوْمَ القِيامَةِ لَفِى مَکانٍ واحِدٍ"۔ یعنی اے فاطمہ میں اور آپ اور یہ جو سو رہا ہے (یعنی علی) حسن اور حسین قیامت کے دن ایک جگہ پر ہوں گے۔ (کنز العمال 6/216)
8۔ امام حسین علیہ السلام کی مدد کرنا واجبات میں سے ہے:
انس بن الحارث بن نے اپنے باپ کہ اصحاب صفہ میں سے ہے روایت نقل کی ہے کہ میں نے سنا رسول اللہ نے حسین کے دامن کو پکڑ کر فرمایا: "انَّ ابْنى هذا يُقْتَلُ فى ارْضٍ يُقالُ لَهَا الْعِراقُ فَمَنْ ادْرَ کَهُ فَلْيَنْصُرْهُ" بتحقیق یہ میرا بیٹا ایسی زمین میں جسے عراق کہتے ہیں قتل کیا جائے گا، بس جو بھی وقت ہو اسے چاہیئے کہ میرے بیٹے کی مدد کرے۔ اسی طرح سیوطی نے بغوی اور ابن السکن اور بارودی اور ابن مندہ اور ابن عساکر نے انس بن حارث سے روایت نقل کی ہے: "انَّ ابْنى هذا يُقْتَلُ بِارْضٍ مِنَ الْعِراقِ يُقالُ لَها کَرْبَلا فَمَنْ شَهِدَ ذلکَ مِنْهُم فَلْيَنصُرْهُ" بتحقیق یہ میرا بیٹا عراق کی سرزمین پر جس کا نام کربلا ہے قتل کیا جائے گا بس جو بھی اس وقت موجود ہو اس پر واجب ہے کہ اس کی مدد کرے۔ (کنز العمال 6/223)۔
9۔ حضرت مہدی عج اولاد حسین علیہ السلام سے ہیں:
خذیفہ نے رسول خدا (ص) سے نقل کیا ہے، "لَوْلَمْ يَبْقَ مِنَ الدُّنْيا الّا يَوْمٌ واحِدٌ لَطَوَّلَ اللَّهُ ذلِکَ الْيَومَ حتّى يَبْعَثَ رَجُلًا مِنْ وُلْدِى اسْمُهُ کَاسْمِى فَقالَ سَلْمانُ: مِنْ اىِّ وُلْدِکَ يا رَسُولَ اللَّه؟ قالَ: مِنْ وُلْدى هذا وَ ضَرَبَ بِيَدِهِ عَلَى الْحُسَيْنِ۔" اگر اس دنیا کا ایک دن ہی باقی کیوں نہ رہ جائے پھر بھی خداوند متعال اس ایک دن کو اتنا لمبا کرے گا یہاں تک کہ ایک مرد کو میرے بیٹوں میں سے کہ جس کا نام میرا نام ہے مبعوث کرے گا، سلمان نے سوال کیا، یا رسول اللہ وہ آپ کے کونسے بیٹے کی اولاد میں سے ہو گا، رسول اللہ نے فرمایا: اس فرزند کی اولاد میں سے اور ساتھ ہی امام حسین علیہ السلام پر ہاتھ رکھا یعنی امام حسین علیہ السلام کی اولاد میں سے ہو گا۔ (ذخائر العقبي 136)۔
10۔ امام مہدی عج امام حسین علیہ السلام کے نویں فرزند ہیں:
سلمان سے روایت ہے وہ کہتا ہے میں رسول خدا کے پاس گیا میں نے دیکھا رسول اللہ نے امام حسین علیہ السلام کو زانو پر بٹھایا ہوا تھا رسول اللہ نے اپنا رخ امام حسین علیہ السلام کی طرف کیا اور انکے منہ پر بوسہ دیا اور فرمایا: تو خود امام ہے امام کا بیٹا ہے اور امام کا باپ ہے، تو حجت ہے، حجت کا بیٹا ہے اور تو نو حجتوں کا باپ ہے وہ نو حجتیں آپ کے صلب میں سے ہیں کہ ان میں سے نویں حجت قائم آل محمد عج ہیں۔ (مقتل خوارزمي 146، ينابيع المودة 445)۔
11۔ رسول خدا صلی کا امام حسین علیہ السلام کے لئے دعا کرنا:
طبرانی نے واثله سے نقل کیا ہے کہ رسول اللہ علی فاطمہ اور حسن و حسین کے لئے اس طرح دعا فرماتے تھے: "الَلّهُمَّ انَّکَ جَعَلْتَ صَلَواتِکَ وَ رَحْمَتَکَ وَ مَغْفِرَتَکَ وِ رِضْوانَکَ عَلى ابراهيمَ و آلِ إِبْراهيمَ اللَّهُمَّ انَّهُم مِنّىِ وَ انَا مِنْهُم فَاجْعَلْ صَلَواتِکَ وَ رَحْمَتَکَ وَ مَغْفِرَتَکَ وَ رِضْوانَکَ عَلَىَّ وَ عَلَيْهِم يَعنِى عَلِيّاً وَ فاطِمَةَ وَ حَسَناً وَ حُسَيناً" خدایا تونے صلوات، رحمت، مغفرت، اور اپنی خوشنودی ابراهیم اور آل ابراهیم کے لئے قرار دی ہیں، خدایا علی و فاطمہ و حسن و حسین مجھ سے ہیں اور میں ان سے ہوں، بس ان کے لئے بھی صلوات، رحمت، مغفرت اور اپنی خوشنودی قرار دے۔ (کنز العمال 6/217)۔
12۔ امام حسین علیہ السلام وہ ہیں جو جنت میں سب سے پہلے جائیں گے:
حاکم اور ابن سعید نے روایت نقل کی ہے کہ رسول اللہ نے علی علیہ السلام کو فرمایا "انَّ اوَّلَ مَنْ يَدْخُلُ الْجَنَّةَ انَا وَ انْتَ وَ فاطِمَةُ وَ الْحَسَنُ وَ الْحُسَيْنُ قالَ عَلِىٌّ: فَمُحِبُّونا؟ قالَ: مِنْ وَرَائِکُمْ"یعنی جو سب سے پہلے جنت میں داخل ہو گا وہ میں تو (علی) فاطمہ حسن و حسین ہوں گے۔ علی علیہ السلام نے سوال کیا، یا رسول اللہ ہمارے ماننے والوں کا کیا بنے گا؟ رسول خدا صلی اللہ علیہ وآلہ وسلم نے فرمایا :وہ ہمارے پیچھے پیچھے آئیں گے۔ (کنز العمال 6/216، صواعق 151)
13۔ امام حسین علیہ السلام رسول اللہ کے عضو ہیں:
صحاح الستہ میں روایت ہے کہ رسول خدا نے ارشاد فرمایا: "ان الحسنین علیهما السلام عضوان من أعضاء النبی ولا یرض لها ما حر الشمس" حسن و حسین میں اعضاء میں سے دو عضو ہیں، میں راضی نہیں ہوں کہ انکو سورج گرمی بھی لگے۔ (فضایل الخمسه من الصحاح الستة ، ج3، ص169-173)۔
14۔ امام حسین علیہ السلام اصحاب کساء میں سے ہیں:
جناب عائشہ نقل کرتی ہیں کہ ایک دن رسول اللہ کو دیکھا، صبح کے وقت سیاہ بالوں سے بنی ہوئی چادر زیب تن کی ہوئی تھی، اسی اثناء میں امام حسن علیہ السلام آئے ان کو عبا کے نیچے لے لیا۔ اس کے بعد امام حسین علیہ السلام آئے ان کو بھی اپنی عبا کے نیچے داخل کر لیا، حضرت زهرا سلام اللہ علیھا آئیں وہ بھی چادر کے نیچے چلی گئیں، پھر علی علیہ السلام آئے وہ بھی چادر کے نیچے چلے گئے، جب یہ سارے چادر کے نیچے جمع ہو گئے تو رسول اللہ نے آیت تطہیر کی تلاوت فرمائی، "إنّما یُرِیدُ اللَّهُ لِیُذْهِبَ عَنکُمُ الرِّجْسَ أهْلَ الْبَیْتِ وَیُطَهِّرَکُمْ تَطْهِیرًا"
15۔ امام حسین علیہ السلام کا جنت کے دروازے پر:
ابن عباس کہتا ہے رسول خدا صلی نے فرمایا: "لا إِله إلاّ الله محمد رسول الله، علی حبیب الله، الحسن و الحسین صفوة الله، و فاطمة خیرةُ الله" جس رات کو معراج پر گیا ہوں، وہاں پر دیکھا تو جنت کے دروازے پر حسین علیہ السلام کا نام لکھا ہوا تھا۔ (كشف الغمة؛ج 1، ص 526)