کیا امریکہ اور ایران کے درمیان جنگ دوبارہ چھڑنے والی ہے

کیا امریکہ اور ایران کے درمیان جنگ دوبارہ چھڑنے والی ہے

ایران کے خلاف امریکہ اور اسرائیل کی جنگ کے مستقل خاتمے اور آبنائے ہرمز کو دوبارہ کھولنے کے لیے جاری سفارتی کوششیں تاحال تعطل کا شکار ہیں، جس کے پیشِ نظر امریکہ نے مشرقِ وسطیٰ میں اپنا تیسرا طیارہ بردار بحری جہاز تعینات کر دیا ہے

تحریر: جواد افضال

 

ایران کے خلاف امریکہ اور اسرائیل کی جنگ کے مستقل خاتمے اور آبنائے ہرمز کو دوبارہ کھولنے کے لیے جاری سفارتی کوششیں تاحال تعطل کا شکار ہیں، جس کے پیشِ نظر امریکہ نے مشرقِ وسطیٰ میں اپنا تیسرا طیارہ بردار بحری جہاز تعینات کر دیا ہے۔

 پیر کے روز ایک امریکی عہدیدار نے الجزیرہ کو بتایا کہ جنگی بحری جہاز ’یو ایس ایس تھیوڈور روزویلٹ‘ مشرقِ وسطیٰ پہنچ چکا ہے۔ یہ طیارہ بردار جہاز خطے میں امریکی سینٹرل کمانڈ (سینٹ کام) کے دائرہ کار میں پہلے سے موجود دیگر دو بحری بیڑوں کے ساتھ شامل ہو گیا ہے۔

امریکہ اور ایران کے درمیان اپریل میں دو ہفتوں کی جنگ بندی ہوئی تھی اور بعد ازاں جون میں ایک وسیع تر مفاہمتی یادداشت کا اعلان کیا گیا، تاہم یہ معاہدہ جولائی کے اوائل میں ٹوٹ گیا۔ تب سے پاکستان اور قطر کے ثالث اس کوشش میں ہیں کہ امریکہ اور ایران کے درمیان ہمہ گیر حملوں کا وہ سلسلہ دوبارہ شروع نہ ہو سکے جس نے مارچ میں پورے خلیجی خطے کو بھی بری طرح متاثر کیا تھا۔

گزشتہ ہفتے امریکی صدر ڈونلڈ ٹرمپ نے قطر کے وزیر اعظم شیخ محمد بن عبدالرحمن بن جاسم الثانی سے مذاکرات کے بعد بیان دیا کہ ایران کے خلاف مزید فوجی کارروائیوں کا امکان "نہ ہونے کے برابر” ہے اور جنگ کا فوجی مرحلہ "عملاً ختم” ہو چکا ہے۔ تاہم، انہوں نے یہ بھی واضح کیا کہ اگر حالات بدلے تو امریکی فوج ہر دم "تیار اور چوکس” ہے۔

کیا خطے میں ایک اور طیارہ بردار بحری جہاز کی تعیناتی کا مطلب یہ ہے کہ ایران کے خلاف امریکہ اور اسرائیل کی جنگ دوبارہ شروع ہونے والی ہے؟ اس حوالے سے دستیاب تفصیلات درج ذیل ہیں:

‘یو ایس ایس تھیوڈور روزویلٹ’ کیا ہے؟

امریکہ کے چھبیسویں صدر تھیوڈور روزویلٹ کے نام سے منسوب یہ جہاز ایٹمی توانائی سے چلنے والا ایک طیارہ بردار بحری بیڑا ہے۔ امریکی بحریہ میں 1986 میں شامل ہونے والے اس جہاز پر پانچ ہزار سے زائد اہلکار اور ساٹھ سے زیادہ طیاروں پر مشتمل ایک مکمل فضائی دستہ موجود رہتا ہے۔ ان طیاروں میں ‘ایف 18’ (F-18) جیسے دو انجنوں والے، آواز کی رفتار سے تیز اڑنے والے اور ہر موسم میں کارروائی کی صلاحیت رکھنے والے کثیر المقاصد لڑاکا طیارے بھی شامل ہیں۔

امریکی بحریہ کے مطابق، اس جنگی جہاز کی بنیادی ذمہ داری "فضائی جنگی کارروائیوں کی انجام دہی اور فضائی دستوں کی منصوبہ بندی، کنٹرول، باہمی رابطے اور یکجہتی میں معاونت فراہم کرنا ہے تاکہ سمندری محاذ پر فضائی جنگ کو مؤثر بنایا جا سکے۔”

جنگی مہمات کے علاوہ، یہ طیارہ بردار جہاز کھلے سمندر میں دیگر جہازوں کو رسد و ایندھن فراہم کرنے اور سمندر میں پھنسے افراد، بشمول پناہ گزینوں، کو بچانے کے فرائض بھی انجام دیتا ہے۔

1990-91 کی خلیجی جنگ کے دوران اسے جنگی کارروائیوں کے لیے بحیرہ روم اور بحیرہ احمر میں تعینات کیا گیا تھا۔ 2003 میں اس نے عراق جنگ کے دوران امریکی حملوں میں بھی معاونت کی۔ اس کے علاوہ 2020-21 میں بھارت، جاپان، آسٹریلیا، جنوبی کوریا اور ملائیشیا کے ساتھ فوجی مشقوں کے لیے اسے ایشیا بحرالکاہل کے خطے میں بھی بھیجا گیا تھا۔

اکتوبر میں ایک امریکی عہدیدار نے الجزیرہ کو بتایا تھا کہ ‘یو ایس ایس تھیوڈور روزویلٹ’ ستمبر میں سان ڈیاگو کے اڈے سے مشرق

وسطیٰ کے لیے روانہ ہوا تھا۔ ایک اور عہدیدار کے مطابق، یہ جہاز 15 نومبر کو مشرق وسطیٰ پہنچ چکا ہے، تاہم پینٹاگون اور خطے میں

فوجی کارروائیوں کی نگرانی کرنے والے ادارے ‘سینٹ کام’ (CENTCOM) نے تاحال اس کی آمد کی باضابطہ تصدیق نہیں کی ہے۔

خطے میں امریکی فوجی تعیناتی کی صورتِ حال کیا ہے؟

مشرقِ وسطیٰ میں طیارہ بردار بحری جہاز یو ایس ایس تھیوڈور روزویلٹ (USS Theodore Roosevelt) کی آمد کے بعد خطے میں سرگرم امریکی کیریئر اسٹرائیک گروپس کی مجموعی تعداد تین ہو گئی ہے۔ اس وقت وہاں پہلے سے تعینات دیگر دو طیارہ بردار جہازوں میں یو ایس ایس جارج واشنگٹن اور یو ایس ایس جارج ایچ ڈبلیو بش شامل ہیں۔

گزشتہ ماہ ایک امریکی عہدیدار نے الجزیرہ کو بتایا تھا کہ یو ایس ایس تھیوڈور روزویلٹ کے پیچھے ‘ماکن آئی لینڈ ایمفیبیئس ریڈی گروپ’ (Makin Island ARG) بھی مشرقِ وسطیٰ روانہ ہو چکا ہے، جس پر دو ہزار سے زائد میرینز سوار ہیں۔ وال اسٹریٹ جرنل کی ایک رپورٹ کے مطابق، اس اسٹرائیک گروپ اور دیگر بحری تعیناتیوں کے نتیجے میں مجموعی طور پر نو سے دس ہزار اضافی امریکی فوجی، بحری اہلکار اور میرینز خطے میں پہنچ سکتے ہیں۔ تاہم، امریکی فوج نے تاحال ان تعیناتیوں کی باضابطہ تصدیق نہیں کی ہے۔

امریکہ نے دہائیوں سے مشرقِ وسطیٰ کے مختلف اڈوں پر اپنی افواج اور عسکری اثاثے تعینات کر رکھے ہیں۔ ان میں سے آٹھ مستقل فوجی اڈے ہیں جو بحرین، مصر، عراق، اردن، کویت، قطر، سعودی عرب اور متحدہ عرب امارات میں واقع ہیں۔ سنہ 2025 کے وسط تک کے اعداد و شمار کے مطابق، مشرقِ وسطیٰ اور اس کے گردونواح میں چالیس سے پچاس ہزار امریکی فوجی موجود تھے، جن میں بڑے مستقل اڈوں کے ساتھ ساتھ خطے بھر میں پھیلے چھوٹے اگلے مورچوں پر تعینات اہلکار بھی شامل ہیں۔

اوپن سورس انٹیلی جنس کے تجزیہ کاروں اور فوجی پروازوں کا سراغ لگانے والے ڈیٹا کے مطابق، امریکہ نے فروری کے اوائل میں، یعنی ایران کے خلاف جنگ شروع ہونے سے قبل ہی، خطے میں ایک سو بیس سے زائد طیارے تعینات کر دیے تھے۔ عراق جنگ کے بعد مشرقِ وسطیٰ میں امریکی فضائی طاقت کا یہ سب سے بڑا اجتماع ہے۔ اطلاعات کے مطابق ان تعینات کردہ طیاروں میں ای تھری سینٹری ایواکس (AWACS) نگرانی کے طیارے، ایف 35 اسٹیلتھ لڑاکا طیارے اور فضا میں برتری قائم رکھنے والے ایف 22 جیٹس کے ساتھ ساتھ ایف 15 اور ایف 16 طیارے بھی شامل ہیں۔

مجموعی طور پر، ایران کے خلاف امریکہ اور اسرائیل کی جنگ شروع ہونے کے بعد سے اب تک تقریباً سات ہزار اضافی امریکی فوجی مشرقِ وسطیٰ میں تعینات کیے جا چکے ہیں۔

ایران کا ردعمل کیا رہا ہے؟

ایران کے نائب وزیرِ خارجہ برائے قانونی و بین الاقوامی امور، کاظم غریب آبادی نے دو ٹوک الفاظ میں کہا ہے کہ ان کا ملک ’’امریکہ کی جانب سے پہل کیے جانے کا انتظار نہیں کرے گا۔‘‘ ان کا کہنا تھا کہ ’’امریکہ شاید سفارت کاری کی آڑ میں محض وقت حاصل کرنا چاہتا ہے تاکہ ایک اور حملے کے لیے زمین ہموار کی جا سکے۔‘‘

 USS Theodore Roosevelt.The nuclear-powered US aircraft carrier

ایران کی خبر رساں ایجنسی ’فارس‘ کی جانب سے جاری کردہ سرکاری ٹی وی کی ایک ویڈیو میں گفتگو کرتے ہوئے غریب آبادی نے خبردار کیا: ’’ایران نہ تو کیوبا ہے جس کی آپ ناکہ بندی کر سکیں، اور نہ ہی وینزویلا ہے جسے آپ ہتھیار ڈالنے پر مجبور کر دیں۔‘‘ انہوں نے مزید کہا کہ امریکی افواج کو اب تک ایران کی نہ تو فضائی ناکہ بندی میں کوئی کامیابی ملی ہے اور نہ ہی زمینی محاصرے میں، جبکہ دوسری جانب پاسدارانِ انقلاب (آئی آر جی سی) اس وقت ’نئی رینج‘ کے حامل میزائل تیار کر رہی ہے۔

ادھر ایران کے وزیرِ خارجہ عباس عراقچی نے خطے میں توانائی کے شعبے میں مضبوط تعاون پر زور دیتے ہوئے خبردار کیا ہے کہ امریکی حملے پورے مشرقِ وسطیٰ کے استحکام کے لیے خطرہ ہیں۔ پیر کے روز اسلام آباد، پاکستان میں اقتصادی تعاون تنظیم (ای سی او) کے وزرائے خارجہ کے اجلاس سے خطاب کرتے ہوئے عراقچی نے کہا: ’’خطے کی توانائی کے تحفظ پر امریکی اور اسرائیلی جارحیت کے بڑھتے ہوئے اثرات کے پیشِ نظر، توانائی کے شعبے میں تعاون کو مضبوط بنانا ایک فوری اور اسٹریٹجک ضرورت بن چکا ہے۔‘‘

سرکاری خبر رساں ایجنسی ’ارنا‘ (IRNA) کے مطابق ان کا مزید کہنا تھا: ’’ہمارے خطے کو نہ صرف ایک خودمختار سیکیورٹی فریم ورک کی ضرورت ہے بلکہ توانائی کے ایک ایسے علاقائی، قابلِ اعتماد اور پائیدار نظام کی بھی حاجت ہے جو توانائی کی ترسیل کو محفوظ بنا سکے، اس کی بلا تعطل فراہمی کو یقینی بنائے، بیرونی عوامل سے لاحق خطرات کو کم کرے اور جغرافیائی و سیاسی جھٹکوں اور رکاوٹوں کا مقابلہ کرنے کے لیے ہماری اجتماعی صلاحیت میں اضافہ کرے۔‘‘

تو کیا سفارت کاری کارگر ثابت ہو سکتی ہے، یا پورا خطہ کسی بڑے تصادم کے دہانے پر کھڑا ہے؟

مشرقِ وسطیٰ اور شمالی افریقہ کے لیے انٹرنیشنل کرائسز گروپ کے ڈپٹی پروگرام ڈائریکٹر، علی واعظ نے الجزیرہ سے گفتگو کرتے ہوئے کہا کہ دونوں فریق اس وقت ایک خطرناک اعصابی جنگ میں الجھے ہوئے ہیں۔ دونوں اس زعم میں مبتلا ہیں کہ حملے کا انتظار کرنے کے بجائے پہل کر دینا زیادہ محفوظ حکمتِ عملی ہے۔ ان کا کہنا تھا، "سب سے بڑا خطرہ یہ ہے کہ ایک اور جنگ کو روکنے کی ان کی کوششیں نادانستہ طور پر ایک ایسی آگ بھڑکا سکتی ہیں جسے نہ کوئی جیت سکے گا، نہ قابو کر سکے گا اور نہ ہی آسانی سے ختم کر پائے گا۔”

دوسری جانب، حملوں کو روکنے اور آبنائے ہرمز کو دوبارہ کھولنے کی سفارتی کوششیں بھی تعطل کا شکار ہیں۔ گزشتہ ہفتے الجزیرہ کو دیے گئے ایک انٹرویو میں ایران کے اسپیکر پارلیمنٹ اور چیف مذاکرات کار محمد باقر قالیباف نے کہا کہ تہران "نہ جنگ، نہ امن” کی اس غیر یقینی کیفیت سے باہر نکلنا چاہتا ہے۔ قالیباف کے مطابق ایران نے ایک قطری ثالث کے ذریعے معاہدے کے لیے سات شرائط پیش کر دی ہیں اور اب امریکہ کے باضابطہ جواب کا منتظر ہے۔ ان کی بیان کردہ شرائط میں امریکی بحری ناکہ بندی اور پابندیوں کا خاتمہ، ایران کے منجمد اثاثوں کی بحالی، تمام محاذوں پر جارحیت روکنا اور جنگ کے باضابطہ خاتمے کا اعلان شامل ہے۔ اس کے برعکس، ٹرمپ انتظامیہ نے پابندیاں مزید سخت کر دی ہیں اور ایرانی بندرگاہوں کی ناکہ بندی برقرار رکھی ہوئی ہے۔

علی واعظ نے صورتحال کا تجزیہ کرتے ہوئے کہا، "سفارت کاری کی نبض ابھی چل ضرور رہی ہے، لیکن باہمی بے اعتمادی اور انتہائی کڑی شرائط کے بوجھ تلے اس کا دم گھٹ رہا ہے۔ اگر دونوں فریقوں نے باعزت واپسی کا کوئی راستہ نہ نکالا، تو یہ مذاکرات محض جنگ کے پے در پے ادوار کے درمیان ایک عارضی وقفہ بن کر رہ جائیں گے۔”

سینٹر فار انٹرنیشنل پالیسی ریسرچ کے نائب صدر راشد المہندی کے نزدیک ایران جنگ میں اس وقت سب سے اہم معاملہ اقدامات کی ترتیب اور فریقین کے اثر و رسوخ کا ہے۔ انہوں نے الجزیرہ کو بتایا کہ اس تنازع کے ممکنہ خاتمے کا دارومدار اس بات پر ہے کہ "کون، کیا، کب اور کیسے کرتا ہے۔” المہندی نے مزید کہا کہ خطے کی طاقتیں ثالثی میں پیش پیش ہیں، جس سے یہ بات واضح ہوتی ہے کہ پورا خطہ ایک مکمل جنگ کی واپسی کے خلاف ہے۔ تاہم، انہوں نے خبردار کیا کہ اس جنگ کے مرکزی کردار اپنی طاقت اور برتری کے حوالے سے متضاد اندازے لگائے بیٹھے ہیں۔ المہندی کا کہنا تھا، "ایرانی سمجھتے ہیں کہ ان کا پلڑا بھاری ہے، جبکہ امریکیوں کا خیال ہے کہ برتری ان کے پاس ہے۔ جب صورتحال ایسی ہو تو کسی سفارتی حل تک پہنچنا خاصا دشوار ہو جاتا ہے۔”

ای میل کریں