بحرینی عوام کے دو اہم مطالبات "امریکی و سعودی افواج کا انخلا اور قید علما کی رہائی" ہیں

بحرینی عوام کے دو اہم مطالبات "امریکی و سعودی افواج کا انخلا اور قید علما کی رہائی" ہیں

علما کی گرفتاری اور مساجد کی مسماری؛ بحرین میں عوامی بے چینی میں اضافے کے عوامل

حوزہ نیوز ایجنسی کے نمائندہ سے گفتگو کے دوران حوزہ علمیہ بحرین کے استاد حجت الاسلام والمسلمین سید علی الموسوی نے بحرین میں پیروانِ مکتبِ تشیع کے خلاف بڑھتے ہوئے دباؤ کی جانب اشارہ کیا اور کہا: اس ملک کے شیعہ انتہائی دشوار حالات سے دوچار اور شدید دباؤ کا سامنا کر رہے ہیں۔ ان کے بنیادی حقوق بالخصوص مذہبی مراسم اور شعائر کی ادائیگی اور سماجی سرگرمیوں میں شرکت کے حقوق کو نظرانداز کیا جا رہا ہے۔

انہوں نے شہریوں کے دینی اور سماجی مطالبات کے حوالے سے بحرینی حکومت کے طرزِ عمل پر تنقید کرتے ہوئے کہا: بحرین کی حکومت نے غلط راستہ اور پالیسی اختیار کر رکھی ہے۔ یہ طرزِ عمل نہ صرف موجودہ مسائل کے حل میں مددگار نہیں بلکہ ملک میں سیاسی اور سماجی بحرانوں کو مزید شدت دے رہا ہے۔ اس کے علاوہ اس سے ان مذہبی شعائر اور مناسک کی آزادانہ ادائیگی بھی متاثر ہو رہی ہے جو ایک طویل عرصے سے بحرینی معاشرے میں رائج ہیں۔

 

علما کی گرفتاری اور مساجد کی مسماری؛ بحرین میں عوامی بے چینی میں اضافے کے عوامل

حوزہ علمیہ بحرین کے استاد نے اس ملک میں مذہبی سرگرمیوں پر عائد پابندیوں کی جانب اشارہ کرتے ہوئے کہا: علما اور دینی مفکرین کی گرفتاری اور قید، مساجد اور حسینیات کی مسماری، نمازِ جمعہ اور نمازِ جماعت کی تعطیلی اور مذہبی تقریبات و مناسبتوں کے انعقاد میں رکاوٹ ڈالنا، بحرین کے سکیورٹی اداروں کی جانب سے کیے جانے والے اقدامات میں شامل ہیں۔

حجت الاسلام والمسلمین الموسوی نے مزید کہا: ان اقدامات کے نتیجہ میں عوامی ناراضگی اور بے چینی میں اضافہ ہوا ہے کیونکہ بحرین کے شہری توقع رکھتے ہیں کہ وہ اپنے مذہبی عبادات اور شعائر آزادانہ طور پر ادا کر سکیں اور انہیں اپنے مذہبی و سماجی حقوق حاصل ہوں لیکن افسوس کہ ان حقوق پر وسیع پیمانے پر پابندیاں عائد ہیں۔

انہوں نے مذہبی آزادیوں کی پامالی روکنے کی ضرورت پر زور دیتے ہوئے کہا: اس بحران کے خاتمے کے لیے ضروری ہے کہ مذہبی آزادیوں میں ہر قسم کی مداخلت بند کی جائے، انسانی اور شہری حقوق کے حوالے سے بین الاقوامی معاہدوں کی پابندی کی جائے اور بحرینی شہریوں کے درمیان امتیازی سلوک ختم کیا جائے۔

 

بحرین کے علما اور دینی مفکرین کے خلاف سزائے موت اور قید کی سزاؤں کی مذمت

حوزہ علمیہ بحرین کے استاد نے اس ملک کے متعدد علما اور دانشوروں کے خلاف سنائی جانے والی سخت سزاؤں کی مذمت کرتے ہوئے کہا: آج ہم دیکھ رہے ہیں کہ بحرین کے متعدد علما اور دینی شخصیات کو سزائے موت، عمر قید اور طویل المدتی قید کی سزائیں سنائی جا رہی ہیں، ہم ان سزاؤں کی شدید مذمت کرتے ہیں۔

انہوں نے ان سزاؤں کو ظالمانہ اور علما و حوزاتِ علمیہ کے خلاف انتقامی کارروائی قرار دیتے ہوئے کہا: بظاہر بحرین کے علما اور عوام کی جانب سے آل خلیفہ حکومت کی پالیسیوں کے خلاف مزاحمت، حکومتی کارکردگی پر تنقید اور ملک سے امریکی افواج کے انخلا کا مطالبہ ان عوامل میں شامل ہیں جن کی بنیاد پر بعض دینی شخصیات کے خلاف ایسی سزائیں سنائی جا رہی ہیں۔

حجت الاسلام والمسلمین الموسوی نے کہا: علما اور دینی مفکرین ہمیشہ عوام اور ان کے مطالبات کے ساتھ کھڑے رہے ہیں۔ دینی شخصیات کے خلاف عدالتی اور سکیورٹی کارروائیاں اور انہیں سخت سزائیں سنانے سے عوام کے جائز مطالبات ختم نہیں کیے جا سکتے بلکہ اس سے موجودہ ناراضگی اور مشکلات میں مزید اضافہ ہوگا۔

 

امریکی اور سعودی افواج کا انخلا اور قید علما کی رہائی؛ بحرین کے عوام کے دو اہم مطالبات

انہوں نے بحرین میں غیر ملکی افواج کی موجودگی کے حوالے سے عوامی مطالبات کی جانب اشارہ کرتے ہوئے کہا: آج بحرین کے عوام اپنے ملک کی سرزمین سے امریکی اور سعودی افواج کے فوری انخلا کا مطالبہ کر رہے ہیں اور اسے اپنے دیگر بنیادی مطالبات کے ساتھ اٹھا رہے ہیں۔

حوزہ علمیہ بحرین کے استاد نے عوام کے دیگر مطالبات کی وضاحت کرتے ہوئے کہا: قید علما کی رہائی، شیعوں کے خلاف امتیازی سلوک کا خاتمہ، شہریوں کے مذہبی حقوق کا احترام اور مذہبی تقریبات و شعائر کے آزادانہ انعقاد کے لیے سازگار ماحول فراہم کرنا بحرین کے عوام کے اہم ترین مطالبات میں شامل ہیں۔

حجت الاسلام والمسلمین الموسوی نے آخر میں زور دیتے ہوئے کہا: تمام شہریوں کے حقوق کا احترام، مذہبی آزادیوں کی ضمانت، علما اور دینی مفکرین کے خلاف سکیورٹی کارروائیوں کا خاتمہ اور مذہبی امتیازی سلوک کا خاتمہ ایسی بنیادی ضرورتیں ہیں جن کی تکمیل سے بحرین میں کشیدگی کم کرنے، قومی اتحاد کو مضبوط بنانے اور استحکام قائم کرنے کی راہ ہموار ہو سکتی ہے۔

ای میل کریں