یہ کون آیا
کہ جس کے لب پر ہے اس اعظم / ہے جس کے ہاتھوں دینِ حق کا عظیم پرچم
یہ کون آیا
بصیرتوں اور بصارتوں کا پیام لے کر / اس عہدِ ظلمت میں روشنی کا نظام لے کر
خدا کا لب پہ کلام لے کر
یہ کون آیا
کہ جس کے لفظوں کے چاند، سورج / تمام لوگوں میں نور تقسیم کررہے ہیں
خدا کی تعظیم کررهے ہیں
یہ کون آیا
کہ جس کے آنے سے ہر صدا / اک صدائے تکبیر بن گئی ہے
علی کی شمشیر بن گئی ہے / ہماری تقدیر بن گئی هے
یہ کون آیا
کہ جس کی سوچوں میں عہد در عہد جاگتے ہیں / کہ جس کی آنکھوں نے آنے والے
کئی زمانوں – کئی زمینوں کو نور بخشا / ہمیں ہمارا شعور بخشا
یہ کون آیا
کہ جس کے آنے سے
خشک کھیتوں، اجاڑ فصلوں کی آگ
گلزار بن گئی ہے
وفا کا معیار بن گئی ہے
یہ کون آیا
کہ جس کے آنے سے
سورہ فیل پھر سے اعجاز بن گئی ہے / کہ ہر ابابیل اپنی دمساز بن گئی ہے
ہماری آواز بن گئی ہے
یہ کون آیا
کہ جس کی خوشبو، ہر ایک گھر میں رچی ہوئی ہے / کہ جس کی تصویر، مرے دل میں سجی ہوئی ہے
یہ کون آیا
کہ جس کے آنے سے ایک عالم / محبتوں اور راحتوں کا نقیب بن کر
چمک رہا ہے، دمک رہا ہے / چمک رہا ہے، دمک رہا ہے