آسماں نے جس کو چُوما وہ زمیں ایران ہے / جس پہ برسا ابرِ ایمان و یقیں ایران ہے
جو تصور سے بھی بڑھ کر ہے حسیں ایران ہے / جو کسی کے سامنے جھکتا نہیں ایران ہے
کشتِ نخوت اُس نے کچھ اِس طرح برباد کی
بن گئی ہیں اِس میں قبریں ظلم و استبداد کی
دَورِ شاہی میں خُمِ مغرب کے بادہ خوار تھے / اہلِ امریکہ کی جھولی میں پڑے بیکار تھے
مستِ دولت، غرقِ سطوت، کم نظر، عیار تھے / رُوح بھی مُردہ تھی اِن کی ذہن بھی بیمار تھے
بندگانِ شاہ اہلِ غرب کے جاسوس تھے
شعلہ حرص و ھوا کے واسطے فانوس تھے
ملتِ اسلامیہ پر جب ہوا فضل خدا / رہبر کامل خمینی سا کیا اِس کو عطا
وہ خمینی جس کا حامل ہے رسولِ دوسرا / وہ خمینی جس کی ضربت، ضربتِ خیبر کُشا
جس نے باطل کو سرِ میداں پچھاڑا وہ زعیم
سامراجی بت کو جس نے کر دیا پل میں دو نیم
عہد تشکیک و جفا میں وہ ہے اک شمعِ یقیں / قائد ملت خمینی، حامی دینِ مُبیں
افتحارِ ملتِ بیضا، انیسِ مومنیں / جس کا نعرہ ہے جہاں میں اتحادِ مُسلمین
اتحادِ باہمی ہی مقصدِ اسلام ہے
رہبر اعظم خمینی کا یہی پیغام ہے
ملتِ ایران نے دُنیا پہ ثابت کردیا / ہے مسلماں کو بھروسہ بس فقط اللہ کا
جبر و استبداد سے دبتا نہیں مردِ خدا / کب ڈرا سکتا ہے اہل دل کو طوفانِ بلا
جذبہ صادق خمینی نے ہے ایسا بھر دیا
مُردہ صد سالہ کو گویا کہ زندہ کردیا
مِٹ گئی تھیں جس طرح قوم ثمود و قومِ عاد / ہوں گے صہیونی اور اُن کے ہم نوا بھی نامراد
نام سُن کر ہی لرزتا ہے عُدوئے بد نہاد / کہیئے مل کر قائدِ دوران خمینی زندہ باد
سارے عالم پر علم لہراے گا اسلام کا
اب جنازہ اٹھ رہا ہے کفر کے اصنام کا