بتارہا ہے فضا ساز انقلاب ترا / حقیقتوں کا ہے آغاز انقلاب ترا
حسنیت کی ہے آواز انقلاب ترا / امام عصر کا اعجاز انقلاب ترا
اسی کے فیض سے ایمان و حق کی بات چلی
اسی کے فیض سے ایران کو حیات ملی
ہر ایک ذہن کو دل کو جگادیا تو نے / نشان جلوہ منزل دکھادیا تونے
اجل کے سایہ میں جینا سکھادیا تو نے / بڑے بڑوں کا تکبر مٹا دیا تونے
ملا جو تاج تو ٹھوکر پہ تو نے ماردیا
تمام گلشن انسانیت سنوار دیا
امیر و رہبر و بانی انقلاب تھا تو / زمانے بھر کی نگاہوں کا انتخاب تھا تو
درحسین (ع) سے اس طرح فیضیاب تھا تو / امام عصر (عج) کی خدمت میں باریاب تھا تو
تری ہی ذات سے لرزاں تھا لشکر باطل
تری ہی ذات سے سہما ہوا تھا ہر قاتل
ترے ہی نقش قدم ہیں چراغ منزل کے / پتے سفینوں کو تو نے دئیے ہیں ساحل کے
بغیر تیرے یہ سب دن لگیں گے مشکل کے / سلام پیش ہیں تیری جناب میں دل کے
زعیم ملت اسلامیہ خدا حافظ
ہے سوگواروں کے لب پر صدا خدا حافظ
ترا وجود تو اظہار واقعات بنا / ترا وجود تو اک قوم کی حیات بنا
ترا وجود رضا شاہ کی ممات بنا / ترا وجود خمینی ہمہ صفات بنا
نہیں ہے! اور ترا انقلاب زندہ ہے
زمیں پہ جیسے کوئی آفتاب زندہ ہے