وہ بھی تھا اک زمانۂ ناپاک
ارض ایراں تھی، ارض وحشتناک
حکمراں تھے شغال اور روباہ
خندہ زن تھی فضا میں روحِ ضحاک
اور گلزار سعدیٔ و عرفی
جب تھا گہوارۂ خس و خاشاک
گہری تاریکیوں میں تھے ملفوف
نور آگیں فضاؤں کے پیماک
رات تھی سنگ زار جبر و ستم
دن تھا ایوان ِآتش ِ سفاک
جذب تھا وقت کی رگ وپے میں
زہر، جس کا نہ تھا کوئی تریاک
ناگہاں کسمسائی، تاریکی
جگمگایا شرارۂ بے باک
ناگہاں یوں ہوا ظہور پذیر
حامل پرچم شہِ لولاک
کشتِ جاں سبز و نغمہ بار ہوئی
آمریت زبون و خوار ہوئی
مصدرِ علم و مخزنِ انوار
پیکر حلم و کاشفِ اسرار
فرق باطل کے واسطے شمشیر
اہل حق کےلئے چمن بکنار
ہر نفس اسوۂ رسول کا نقش
ہر نظر پیرو شہِ ابرار
بزم میں نرم مثلِ تار حریر
رزم گاہوں میں ابر صاعقہ بار
کیا صدا تھی کہ جس نے توڑ دیے
غفلت و بے حسی کے سارے حصار
کیا نظر تھی کہ جس کے اٹھتے ہی
سلب ہوتی تھی جرأتِ گفتار
کیا سخن تھا کہ جسکی خوشبو سے
اب بھی ہیں عطر بیز دل کے دیار
کیا گہر تھا کہ جس کہ تابش سے
صدفِ جاں ہوا بلند وقار
ایک آئینہ جمال افروز
بے کراں ہستی خیال افروز
گرچہ ہم میں وہ اب نہیں موجود
پھر بھی اس کا پیام لامحدود
یوں ہے دل کی بساط پر روشن
فصل ِ خورشید کی ہو جیسے نمود
خیمۂ کائنات ہے جب تک
جب تلک ہے نظام ہست و بود
خامۂ برق لوح ِ دل یہ لکھے
اس کا اسمِ مبارک و مسعود
چہرہ تابِ دل و نگاہ رہے
ضوفشاں مثل ِ مہر و ماہ رہے
شاعر: عشرت ظفر ۔ ہندوستان