ہم نے مرحلے کوعزت و وقار کے ساتھ عبور کر لیا ہے، شہداء کی برکت سے بہتر مستقبل کی امید:آیت اللہ سید حسن خمینی
جماران نیوز ایجنسی ابنا کی رپورٹ کے مطابق، امام خمینی کے پوتے آیت اللہ سید حسن خمینی نے شہید سپہبد سید عبدالرحیم موسوی کے اہلِ خانہ سے ملاقات میں کہا کہ ایران نے ایک اہم اور سخت مرحلہ عزت و وقار کے ساتھ عبور کر لیا ہے اور شہداء کی قربانیوں کی برکت سے آنے والے دن بہتر ہوں گے۔
انہوں نے کہا کہ ایسے بڑے واقعات کے بعد معاشرے کا سنبھل جانا آسان نہیں ہوتا، لیکن ایرانی قوم نے ثابت کیا ہے کہ اس کی بنیادیں مضبوط ہیں اور وہ اتحاد و استقامت کے ساتھ ہر مشکل کا مقابلہ کر سکتی ہے۔
آیت اللہ سید حسن خمینی نے شہید موسوی کو خراجِ عقیدت پیش کرتے ہوئے کہا کہ وہ نہایت سچے، باحوصلہ اور خوداعتماد شخصیت کے مالک تھے۔ ان کے مطابق شہید موسوی نہ صرف میدانِ جنگ میں دلیر تھے بلکہ اپنے نظریات اور خیالات کے اظہار میں بھی بے حد واضح اور جرات مند تھے۔
انہوں نے کہا کہ شہید موسوی نے دفاعی نظام کی تشکیل اور تنظیم میں اہم کردار ادا کیا، اور ان کی تیار کردہ حکمتِ عملی نے مشکل حالات میں بھی مؤثر ثابت ہو کر ملک کو سہارا دیا۔
اس موقع پر شہید موسوی کے اہلِ خانہ نے بھی ان کی زندگی کے مختلف پہلوؤں پر روشنی ڈالی۔ ان کے بھائی نے بتایا کہ وہ سادگی پسند، عبادت گزار اور گمنامی کو ترجیح دینے والی شخصیت تھے۔ وہ ہمیشہ اپنے اہلِ خانہ کو دنیاوی عہدوں اور مراعات سے دور رہنے کی تلقین کرتے تھے۔
انہوں نے شہادت سے قبل کا ایک واقعہ بیان کرتے ہوئے کہا کہ روانگی سے پہلے شہید موسوی نے ایک مختصر نوٹ لکھا جس میں انہوں نے دنیا کی حقیقت پر گہرا فلسفیانہ انداز میں اظہار کیا۔ ان کے مطابق انہوں نے لکھا کہ اگر انسان سب کچھ حاصل کر لے تو بھی حقیقت میں کچھ نہیں پاتا، اور اگر سب کچھ کھو دے تو بھی دراصل کچھ نہیں کھوتا۔
یہ نوٹ لکھنے کے کچھ ہی دیر بعد وہ اپنے مشن پر روانہ ہوئے اور تقریباً ایک گھنٹے کے اندر شہادت کے درجے پر فائز ہو گئے۔