زہرا مصطفوی کا آیت اللہ سید مجتبی خامنہ ای کو پیغامِ مبارکباد
اسلامی انقلاب کے بانی امام خمینی کی صاحبزادی زہرا مصطفوی نے آیت اللہ سید مجتبی خامنہ ای کو ایران کی قیادت سنبھالنے پر مبارکباد دیتے ہوئے کہا ہے کہ یہ انتخاب اسلامی نظام کی سیاسی خودمختاری کی علامت ہے۔
اپنے پیغام میں انہوں نے لکھا کہ مجلس خبرگانِ رہبری کی جانب سے آپ کو اسلامی جمہوریہ ایران کی قیادت کے لیے منتخب کیے جانے پر میں آپ کو مبارکباد پیش کرتی ہوں۔ ان کے مطابق یہ انتخاب اسلامی نظام کی سیاسی آزادی اور خودمختاری کو ظاہر کرتا ہے، جو بانی انقلاب امام خمینی اور شہید رہنما کی ایک اہم اور دیرپا میراث ہے۔
زہرا مصطفوی نے امید ظاہر کی کہ آیت اللہ سید مجتبی خامنہ ای امام زمانہؑ کی توجہات اور عوامی حمایت کے سائے میں انقلاب اسلامی کے اصولوں کے تحفظ، اس کی مضبوطی اور ایران کی علاقائی سالمیت کے دفاع میں کامیاب رہیں گے۔
انہوں نے مزید کہا کہ موجودہ دور میں ایرانی قوم جس غیر معمولی اتحاد کا مظاہرہ کر رہی ہے، وہ نئے رہنما کی قیادت میں انقلاب کے مقاصد کو مضبوط بنانے میں اہم کردار ادا کرے گا اور ایران کے عوام کی دعائیں ان کے ساتھ ہوں گی۔