اسکردو، نیو یادگار شہداء کے مقام پر عوام نے مصر سے آئے ہوئے مہمان قراء کا شایان شان استقبال کیا۔
گلگت بلتستان کے تینوں ڈویژن میں محکمہ سیاحت و ثقافت کیجانب سے منعقد ہونے والی پہلی بین الاقوامی محفل قرائت قرآن کریم کی تقاریب، اسکردو میں اختتام پذیر ہوگئیں۔
اس سلسلے میں آخری روز اسکردو میں نیو یادگار شہداء کے مقام پر عوام کی ایک بڑی تعداد نے شرکت کی اور مصر سے آئے ہوئے مہمان قراء کا شایان شان استقبال کیا۔
اسلام ٹائمز کے مطابق، تقریب میں سینیئر وزیر حاجی اکبر تابان، صوبائی وزیر تعلیم حاجی محمد ابراہیم ثنائی، ممبر جی بی کونسل و چیئرمین اسٹینڈنگ کمیٹی اشرف صداء، ممبر جی بی کونسل وزیر اخلاق، سیکرٹری اطلاعات جی بی فدا حسین، سینیئر افسران کے ساتھ ساتھ جید علمائے کرام نے خصوصی طور پر شرکت کی۔
محفل انس میں شرکت کےلئے خصوصی طور پر مصر سے نامور قراء حضرات کو مدعو کیا گیا تھا، جن میں فضیلۃ الشیخ ڈاکٹر القاری ایمن عیسٰی حطیبہ المصری، فضیلۃ الشیخ ڈاکٹر القاری عادل البازی المصری اور فضیلۃ الشیخ ڈاکٹر القاری عبد الغفار المکاوی المصری شامل تھے۔ ان قراء حضرات نے نہایت خوش الحانی کے ساتھ تلاوت کرکے سامعین کے دل موہ لئے۔ شرکاء ہر آیت قرآنی پر قراء کو داد و تحسین دیتے رہے۔
اسکردو بلتستان میں ہونے والی تقریب اتوار کی دوپہر دو بجے شروع ہوئی۔