حجت خالق کے نائب، بندہ عالی مقام
ہے شریعت پر مکمل پیروی تیرا مقام
ذات ہے لا ریب تیری روح اسلامی نظام
ہوگا اک دن تو یقینـاً کامران وشاد کام
السلام اے سالک راہ حسینی السلام
السلام اے مرد مؤمن اے خمینی السلام
تو کہ ہے اس دور ظلمت میں مکمل روشنی
تجه سے حاصل ہو رہی ہے اک مسلسل روشنی
کر رہی ہے کفر کی دنیا میں ہلچل روشنی
اہل ایماں کو میسر اب ہے پل پل روشنی
السلام اے سالک راہ حسینی السلام
السلام اے مرد مؤمن اے خمینی السلام
دوست ہے سچوں کا اور جهوٹوں سے تو بیزار ہے
شخصیت سے تیری ظاہر حیدری کردار ہے
دشمنان حق سے تو، یوں بر سر پیکار ہے
جیسے سرگرم عمل، اللہ کی تلوار ہے
السلام اے سالک راہ حسینی السلام
السلام اے مرد مؤمن اے خمینی السلام
ہر مسلماں کے لئے ہے ذات تیری پاسباں
ہر منافق کے گلے پر تو ہے تیغ بے اماں
قافلہ ہے دین کا تیری قیادت میں رواں
دے رہا ہے تیرا ہر اک گام منزل کا نشاں
السلام اے سالک راہ حسینی السلام
السلام اے مرد مؤمن اے خمینی السلام
نازش رضوی - پاکستان