ایران کسی بھی صورت میں استعماری طاقتوں کے سامنے سرنہیں جھکائے گا
ایران کے صدر ڈاکٹر حسن روحانی نے کہا ہے کہ ایٹمی مذاکرات اور ایٹمی سمجھوتہ عالمی معاہدوں پر ایران کے کاربند ہونے کے ترجمان ہیں- انہوں نے کہا کہ اسلامی جمہوریہ ایران کی پالیسی کی بنیاد دنیا کے مختلف ملکوں کے ساتھ تعمیری مفاہمت پر استوار ہے۔
اسلامی جمہوریہ ایران کے صدر ڈاکٹر حسن روحانی نے منگل کے روز ایران - سوئیس اقتصادی ماہرین اور تاجروں کے مشترکہ اجلاس میں جس میں سوئیٹزر لینڈ کے صدر نے بھی شرکت کی خطاب کرتے ہوئے کہا کہ اسلامی جمہوریہ ایران دنیا کے ساتھ دوستانہ، قانونی اور تعمیری مذاکرات کا خواہاں ہے اور اس سلسلے میں اس نے بہترین کردار ادا کیا ہے۔صدر مملکت نے دنیا میں غیر قانونی اقدامات کی ترویج کے لئے بعض ملکوں کی کوششوں کی طرف اشارہ کرتے ہوئے کہا کہ ایران اور سوئیٹزر لینڈ، بین الاقوامی قوانین اور دونوں ملکوں کی قوموں کے مفادات کے دائرے میں اپنے دو طرفہ اقتصادی و تجارتی تعلقات کو فروغ دینے کا عزم رکھتے ہیں۔صدر ڈاکٹر حسن روحانی نے دونوں ملکوں کے اقتصادی تعاون کی توسیع کی ضرورت پر زور دیتے ہوئے کہا کہ تجار و صنعتکار اور روزگار کے مواقع فراہم کرنے والے ماہرین، دونوں ملکوں کے مفادات کی بنیاد پر خاص طور سے دوائیں اور طبی وسائل تیار کئے جانے اور اسی طرح غذائی اشیا کی پیداوار کے ذریعے دو طرفہ تعلقات کو فروغ دے سکتے ہیں۔اس اجلاس میں سوئیٹزرلیند کے صدر نے بھی ایران کے ساتھ تعاون کی توسیع پر زور دتے ہوئے کہا کہ سائنس و تحقیقات، میڈیکل سائنس اور نقل و حمل کے شعبوں میں متعدد سمجھوتوں پر دونوں ملکوں کے حکام کے دستخط دونوں ملکوں کے لئے خاص اہمیت کے حامل ہیں۔سوئیٹزر لینڈ کے صدر نے کہا کہ ان کا ملک ایٹمی معاہدے کا حامی ہے اور اسے وہ ایک بڑی سفارتی کامیابی سمجھتا ہے۔انھوں نے کہا کہ تمام رکن ملکوں کو چاہئے کہ ایٹمی معاہدے پر سنجیدگی سے عمل کریں۔ انھوں نے کہا کہ سوئیٹزر لینڈ، ایران کے ساتھ مالی معاملات کا خواہاں ہے اور اس سلسلے میں دونوں ملکوں کے مشترکہ اقتصادی اجلاس کی کمیٹی کی تشکیل پہلا قدم ہے۔واضح رہے کہ ایران کے صدر ڈاکٹر حسن روحانی، ایٹمی معاہدے سے امریکہ کی علیحدگی کے بعد سوئیٹزر لینڈ اور آسٹریا کے سربراہوں کی دعوت پر پیر کے روز یورپی ملکوں کے دورے پر گئے ہیں۔
اس سے قبل ایرا نی حسن روحانی سوئیٹزرلینڈ کے صدر کے ساتھ ہونے والی خصوصی ملاقات میں ایران اور سوئیٹزرلینڈ کے درمیان دوستانہ اور قریبی تعلقات کا حوالہ دیتے ہوئے کہا کہ یہ دورہ مختلف شعبوں میں دوطرفہ تعلقات کی توسیع کے لیے ایک اچھا موقع ہے ۔حسن روحانی نے جوہری معاہدے کو چند فریقی اور بین الاقوامی معاہدہ قرار دیتے ہوئے کہا کہ جوہری معاہدے سے امریکہ کی علیحدگی سے یہ بات ظاہر ہوتی ہے کہ وہ عالمی سطح پر اپنے وعدوں کا پابند نہیں ہے.
ادہر صدر روحانی نے سوئٹزر لینڈ میں مقیم ایرانی شہریوں کے اجلاس سے خطاب کرتے ہوئے کہا بیرون ملک مقیم ایرانی ملک کے سرمایہ ہیں۔
حسن روحانی نے ایرانی شہریوں کو یقین دلایا کہ ایران کسی بھی صورت میں استعماری طاقتوں کے سامنے سرنہیں جھکائے گا.