تحریر: معصومہ شیرازی
خانم مرضیہ دباغ کا مرقدِ منور، امام خمینیؒ کے حرم کے جوار میں واقع ہے۔ وہ ایک عظیم، بیدار اور باعمل خاتون تھیں، جن کی زندگی تاریخ کے ماتھے پر رقم اس داستان کی یاد دلاتی ہے جس کا ایک روشن باب خانۂ کعبہ کے قریب مدفون حضرت ہاجرہؑ کی ذات ہے۔ مہمانانِ خدا اس خدا پرست ماں کی زیارت کرتے اور رضائے الٰہی کی خاطر ان کی مشکل ترین ہجرت کو سلامِ عقیدت پیش کرتے ہیں۔ بالکل اسی طرح، بانیِ انقلاب اسلامی کے حرمِ مطہر میں حاضر ہونے والے عاشقانِ انقلاب بھی اس عظیم خاتون کے حضور خراجِ عقیدت پیش کرتے ہیں۔
خانم مرضیہ دباغ اپنے عہد کی فکری اور نظریاتی محاذوں کی ایک ایسی توحیدی مجاہدہ تھیں، جنہوں نے اپنی پوری زندگی انقلاب، بیداری اور شعارِ زینبی کے لیے وقف کر دی اور تاریخ کے آفاقی صفحات میں ہمیشہ کے لیے امر ہو گئیں۔
ایرانی معاشرے کی اس ثقافتی فضا میں، جہاں خواتین کے لیے لکھنا سیکھنا بھی آسان نہ تھا، ایک جانباز، سرفروش، بہادر اور صاحبِ استقلال خاتون نے جنم لیا، جس نے تاریخ کے بدلتے دھاروں میں وقت کی موجوں کا رخ موڑ دیا۔ انہوں نے گل ہائے انقلاب کو اپنے خونِ جگر سے سینچا، جذبے کی شدت اور فکر کی حرارت سے میدانِ عمل کو گلزار بنایا اور انقلاب کی رگوں میں لہو بن کر دوڑیں۔ سرزمینِ ہمدان پر کھلنے والا یہ گلِ لالہ آج بھی انقلاب کے چاہنے والوں کے لیے ایک عظیم حوالہ ہے۔ ’’مادرِ انقلاب‘‘ کا لقب پانے والی یہ عظیم المرتبت خاتون تاریخ کے معتبر تذکروں میں آج بھی زندہ ہیں۔
خانم مرضیہ دباغ سیاسی جدوجہد کی ایک عظیم داستان، سپاہِ پاسدارانِ انقلاب اسلامی کی تشکیل میں اہم کردار ادا کرنے والی رہنما، صاحبِ قلم اور عظیم انقلابی شخصیت تھیں۔ شادی کے بعد اپنے صاحبِ فکر و بیدار شوہر کی رفاقت میں تہران ہجرت کی، حوزوی دروس سے استفادہ کیا اور خواتین کے لیے علم و آگہی کے راستے میں حائل رکاوٹوں کو عبور کیا۔ انہوں نے حضرت خدیجہؑ کے عظیم اسوے کو اپنی عملی زندگی میں زندہ کیا اور خواتین کے مقام و مرتبے کو بلند کرنے کے لیے جدوجہد کی۔ میدانِ انقلاب میں بیداری کے پرچم کو بلند کرنا ان کی زندگی کا بنیادی مقصد بن گیا۔
1342 ہجری شمسی میں بانیِ انقلاب اسلامی امام خمینیؒ سے بالمشافہ ملاقات نے ان کی زندگی کا رخ بدل کر رکھ دیا۔ ان کی روح انقلاب کے جذبے سے سرشار ہو گئی اور دل کا ہر گوشہ نغمۂ انقلاب بن گیا۔ یہ ملاقات کچھ ایسی ہی تھی جیسے حُر نے امام حسینؑ کی قربت حاصل کرنے کے بعد ظلمتوں کی وادی چھوڑ کر صبحِ نور کا راستہ اختیار کیا تھا۔ گویا امام خمینیؒ سے پہلی ملاقات کے بعد خانم مرضیہ بھی حُر مزاج بن کر حسینی راستوں کی ایک سرفروش مجاہدہ بن گئیں۔
اس کے بعد اس جانباز مجاہدہ نے جلاوطنی کے دوران نجف میں قیام پذیر امام خمینیؒ کے فتاویٰ، اعلانات اور پیغامات کو پورے ایران میں پہنچانے کا عظیم مشن سنبھال لیا اور اپنے شب و روز اسی مقصد کے لیے وقف کر دیے۔ شہر شہر اور قریہ قریہ امام خمینیؒ کے پیغامات پہنچانے والی یہ مجاہدہ ایسے سفر کی مسافر بنیں جہاں عاشورائی پرچم کی سرخی قلب و نظر کو پرواز کے لیے نئے حوصلے عطا کرتی ہے۔
خانم مرضیہ نے خواتین میں انقلابی جدوجہد کا فکری سلسلہ پروان چڑھایا اور گھروں کی چار دیواری کے اندر انقلاب کے نعروں اور بیداری کی آواز کو عام کرنے کی بنیاد رکھی۔ انقلاب کی راہ ہموار کرنے کے لیے مختلف علاقوں میں انقلابی کارکنوں کے دفاتر قائم کرنا اور ان کی سہولت کے لیے خفیہ پناہ گاہوں کا انتظام کرنا بھی ان کے اہم مشن کا حصہ تھا۔
شاہی حکومت کی سفاک خفیہ ایجنسی ساواک نے مرضیہ دباغ کی اس بے مثال استقامت کو اپنے ظالمانہ ہتھکنڈوں کے ذریعے توڑنے کی کوشش کی۔ اسی سلسلے میں ان کی سترہ سالہ بیٹی رضوانہ کو گرفتار کیا گیا، جو انقلابی ترانے، خبریں اور اشعار پڑھ کر انقلابی نشریاتی ریڈیو پر اپنی والدہ کی ہم فکر اور ہم آواز بن چکی تھیں۔ رضوانہ کو ان کی والدہ کے سامنے بہیمانہ تشدد کا نشانہ بنایا گیا تاکہ خانم مرضیہ کے حوصلے پست کیے جا سکیں۔
خود مرضیہ دباغ کو بھی گرفتار کر لیا گیا۔ بے پناہ تشدد، برقی جھٹکوں، جسمانی اذیت اور ذہنی دباؤ کے ہولناک طریقوں سے ان کے عزمِ زینبی کو شکست دینے کی بھرپور کوشش کی گئی، لیکن خانم مرضیہ کوہِ گراں کی طرح ڈٹی رہیں اور وقت کے ستم گروں کے سامنے سینہ سپر ہو کر محاذِ عشق پر ثابت قدم رہیں۔
نجف کے بعد فرانس میں امام خمینیؒ کی جلاوطنی کے دوران جب وہ پیرس تشریف لے گئیں تو اس عظیم مجاہدہ نے امام خمینیؒ کے کمرے کے دروازے پر ہی اپنا پڑاؤ ڈال دیا اور دن رات ان کی حفاظت کے لیے وقف کر دیے۔ امام خمینیؒ کی خدمت، ان تک پہنچنے والے پیغامات اور دیگر اہم امور کی نگرانی کے علاوہ خدمت گزاری کے تمام فرائض انجام دیتی رہیں۔ ایک موقع پر ایک صحافی کے مشکوک عزائم کا مقابلہ کرتے ہوئے وہ شدید زخمی بھی ہوئیں، لیکن اپنے رہبر کی حفاظت کے لیے ہر وقت چوکس، تیار اور مستعد رہیں۔ گویا مرضیہ دباغ نے اپنی جان و مال سب کچھ راہِ انقلاب میں داؤ پر لگا رکھا تھا۔
یہ مجاہدہ انقلاب کی کامیابی کے بعد بھی مسلسل مصروفِ عمل رہیں۔ انقلاب کے استحکام اور اس کی بقا کے لیے جو کام ضروری تھا، اس میں بڑھ چڑھ کر حصہ لیتی رہیں۔ جن علاقوں میں انقلابی اثرات کمزور تھے، وہاں بھی یہ چٹان صفت مجاہدہ اپنے عزم و حوصلے کے جوہر دکھاتی رہیں۔ خانم مرضیہ کردستان کے مضافاتی علاقوں اور دیگر خطوں میں انقلاب کے آفاقی اور عظیم پیغام کو پہنچانے کے لیے سرگرمِ عمل رہیں۔
انہوں نے جامعات میں نوجوانوں کو بیدار اور متوجہ کیا اور انقلابی مراکز قائم کیے تاکہ انقلاب کی راہ نوجوانوں کے پُرجوش اور ولولہ انگیز جذبوں سے مزید مضبوط ہو۔ خانم مرضیہ کی بصیرت کا ایک نمایاں پہلو ان کی سماجی اور معاشرتی خدمات بھی تھیں۔ انہوں نے اپنی خصوصی کوششوں سے انقلابی نوجوانوں کے رشتے اور شادیاں طے کرانے میں کردار ادا کیا اور ایسے گھرانوں کی تشکیل میں مدد دی جو انقلاب کے محاذوں میں تبدیل ہو گئے۔ یوں ایسے گھر آباد ہوئے جہاں فکرِ انقلاب کی آبیاری ہوتی رہی اور یہ گھر انقلابی کارکنوں کے لیے پناہ گاہوں کی صورت اختیار کر گئے۔
یورپ میں علاج کی غرض سے قیام کے دوران بھی انہوں نے وہاں کی دانش گاہوں اور جامعات میں طلبہ تنظیموں کی تشکیل اور تربیت میں فعال کردار ادا کیا۔ ان کی یہی بین الاقوامی سرگرمیاں تھیں جن سے خوف زدہ ہو کر ساواک نے انہیں گرفتار کیا اور انتہائی تشدد آمیز ماحول میں رکھ کر ان کے حوصلے پست کرنے کی کوشش کی۔
بہیمانہ تشدد کے نتیجے میں مرضیہ دباغ کا جسم زخموں سے چور ہو گیا۔ اعصابی اذیتوں اور ذہنی دباؤ کے باعث وہ ایک طویل عرصے تک شدید تکلیف میں مبتلا رہیں، لیکن اللہ تعالیٰ نے ان کی رہائی کا ایک غیر معمولی انتظام فرمایا۔ وہ ایک متعدی بیماری میں مبتلا ہو گئیں، جس کے بعد دیگر قیدیوں نے احتجاج کیا اور انہیں اس بیماری سے محفوظ رکھنے کا مطالبہ کیا۔ یہاں تک کہ ساواک کا عملہ بھی اس بیماری کے پھیلاؤ سے خوف زدہ ہو گیا۔ چنانچہ اسی صورتِ حال کے نتیجے میں انہیں جلد رہائی نصیب ہو گئی۔
خانم مرضیہ نے خانۂ خدا کی جانب بھی سفر کیا۔ ایامِ حج میں اس ہاجرہ صفت توحید پرست خاتون نے مختلف ممالک سے آئے ہوئے حجاج اور دیگر زائرین تک انقلابی پیغامات پہنچائے اور انہیں امام خمینیؒ کی شخصیت اور ان کے انقلابی افکار سے روشناس کرانے کے لیے بھرپور کردار ادا کیا۔ انہوں نے اس عظیم اجتماع میں شعور و آگہی کا پیغام عام کیا اور حج کی حقیقی روح کو اپنے عمل سے اجاگر کیا۔
جس طرح سید الشہداء امام حسینؑ نے ایامِ حج میں امت کو ستم گروں، خیانت کاروں اور فتنہ پرور عناصر کے خلاف قیام کا حوصلہ دیا، اسی طرح مرضیہ دباغ بھی راہِ قیام کی اس عظیم جدوجہد کی ایک مسافر تھیں۔ ان کے لیے سفرِ حج محض ایک عبادتی سفر نہیں تھا بلکہ انقلابِ اسلامی کے پیغام اور اس کے اہداف کی ترویج کا ایک اہم ذریعہ بھی بن چکا تھا۔
راہِ حق کی یہ بلند نظر مجاہدہ شہید امام موسیٰ صدر اور شہید مصطفیٰ چمران کے ہمراہ اسرائیل کے خلاف متعدد خفیہ سرگرمیوں میں بھی شریک رہیں۔ وہ صہیونی دشمن کے خلاف برسرِ پیکار رہیں اور مظلوم لبنانی و فلسطینی عوام کی خدمت کے لیے اپنی صلاحیتیں وقف کر دیں۔ بالخصوص مظلوم لبنانی خواتین کو دفاعی امور کی تربیت دینے کے لیے خصوصی تربیتی کیمپوں میں اہم کردار ادا کیا اور انہیں دشمن کے مقابلے میں استقامت، طاقت اور حوصلے کا درس دیا۔ لبنانی خواتین انہیں محبت و احترام سے ’’بہن طاہرہ‘‘ کہہ کر پکارتی تھیں۔
خانم مرضیہ دورانِ انقلاب لندن میں شاہ مخالف مظاہروں میں بھی شریک رہیں اور ان کے انعقاد میں اہم کردار ادا کیا۔ انقلابِ اسلامی کی شاندار کامیابی کے بعد بھی یہ مجاہدہ اپنی ذمہ داریاں نبھاتی رہیں۔ سپاہِ پاسدارانِ انقلاب اسلامی کی تشکیل میں انہوں نے نہایت اہم کردار ادا کیا، کیونکہ وہ اس حقیقت سے بخوبی آگاہ تھیں کہ نظریے کی کامیابی کے بعد اس کے تحفظ اور دفاع کی ذمہ داری بھی اہلِ نظریہ ہی پر عائد ہوتی ہے۔ طاغوتی قوتیں ہمیشہ حق و حقیقت کے نظریے کو نشانہ بنانے کی کوشش کرتی ہیں۔
علامہ اقبال نے اسی حقیقت کو ان الفاظ میں بیان کیا ہے:
ستیزہ کار رہا ہے ازل سے تا امروز
چراغِ مصطفوی سے شرارِ بولہبی
انقلابِ اسلامی کے بعد سپاہِ پاسداران کے پہلے کمانڈر جواد منصوری کے ساتھ مل کر انہوں نے کرد علاقوں میں باصلاحیت اور پُرجوش نوجوانوں کو انقلاب کے ہراول دستوں میں تبدیل کرنے کے لیے جدوجہد کی اور اس طرح انقلابِ اسلامی کی بنیادوں کو مزید مستحکم کرنے میں کردار ادا کیا۔ اسی جدوجہد کے نتیجے میں اس دفاعی و انقلابی تنظیم کو سپاہِ پاسدارانِ انقلاب اسلامی کے نام سے منظم کیا گیا۔
خانم مرضیہ کی مجاہدانہ خدمات میں اسلحے اور منشیات کے اسمگلروں کے خلاف براہِ راست جدوجہد بھی شامل تھی۔ یہ مجرمانہ عناصر انقلاب کے پاکیزہ نظریات اور معاشرتی اقدار کے لیے خطرہ بن رہے تھے۔ وہ سمجھتی تھیں کہ ایسی منفی قوتیں انقلاب کے پاکیزہ ماحول کو آلودہ کرنے کا باعث ہیں، چنانچہ ایک عرصے تک وہ ان عناصر کے خلاف بھی سرگرمِ عمل رہیں۔
انقلاب کے بعد انہوں نے اسی عاشورائی فکر کو معاشرے کے افراد کے دلوں میں زندہ رکھنے کے لیے جدوجہد جاری رکھی اور بسیجی خواتین کی انقلابی تربیت میں اہم کردار ادا کیا۔ انقلابِ اسلامی کے تحفظ کے لیے خواتین کو منظم اور فکری طور پر تیار کرنا ان کی ترجیحات میں شامل تھا۔ بسیج کی فکری بنیادوں کو مستحکم کرنے میں خانم مرضیہ کا کردار بھی قابلِ ذکر ہے۔ آج یہی نظریاتی قوت انقلابِ اسلامی کے تحفظ کے مضبوط حصاروں میں سے ایک ہے۔
سابق سوویت یونین کے صدر میخائل گورباچوف کے نام امام خمینیؒ کے تاریخی خط کو پہنچانے کے لیے جن شخصیات کا انتخاب کیا گیا، ان میں خانم مرضیہ دباغ کا نام بھی شامل تھا۔ اس تاریخی خط میں امام خمینیؒ نے اس وقت کی ایک بڑی عالمی طاقت کے سربراہ کو اسلام کا پیغام دیا اور اسے فکرِ توحید اور تعلیماتِ اسلامی کی روشنی میں حقیقت و معنویت کے راستے پر آنے کی دعوت دی۔ خانم مرضیہ دباغ اس تاریخی پیغام کی قاصدہ بنیں اور اس اہم ذمہ داری کو انجام دینے کا شرف حاصل کیا۔
آج وہ ہاجرہ صفت خاتون، جو اپنی پوری زندگی راہِ حق، انقلاب اور بیداری کے لیے وقف کیے ہوئے تھیں، امام خمینیؒ کے مبارک، نورانی اور ملکوتی مرقد کے سائے میں محوِ خواب ہیں۔ ان کی زندگی جدوجہد، استقامت، شجاعت، بصیرت اور ایثار کی ایک روشن داستان ہے۔ انقلابِ اسلامی کی تاریخ ان کی یادگار خدمات، بے مثال قربانیوں اور مجاہدانہ سرگرمیوں کو ہمیشہ یاد رکھے گی۔ خانم مرضیہ دباغ کی زندگی آنے والی نسلوں کے لیے یہ پیغام چھوڑ گئی ہے کہ حقیقی انقلابی جدوجہد صرف نعروں سے نہیں بلکہ ایمان، بصیرت، قربانی اور مسلسل عملی جدوجہد سے عبارت ہے۔