سپر طاقتوں کو ایران کے انقلاب سے خوف ہے

اسلامی انقلاب کے بانی حضرت امام خمینی نے، ایران کے دشمن طاقتوں کی طرف اشارہ کرتے ہوئے فرمایا کہ ان طاقتوں کو یہ خدشہ ہے کہ اسلامی انقلاب ایران دوسرے اسلامی اور غیر اسلامی ممالک تک پھیل سکتا ہے اور ان کے زیرِ تسلط ممالک سے ان کا اثر و رسوخ ختم ہوسکتا ہے۔ معاشی پابندیوں اور فوجی حملوں میں مطلوبہ نتائج حاصل نہ ہونے کے بعد انہوں نے ایک اور طریقہ اختیار کیا ہے تاکہ دنیا کے مسلمانوں کی نظر میں اسلامی انقلاب کی ساکھ کو متاثر کیا جائے، مسلمانوں کو آپس میں لڑایا جائے اور اسلامی ممالک میں اپنے تسلط اور استحصال کا سلسلہ جاری رکھا جائے۔

انہوں نے کہا کہ اسی مقصد کے تحت، ایسے وقت میں جب ایران تمام مسلمانوں کے درمیان اتحاد، اسلام اور توحید کے فروغ کی کوشش کر رہا ہے، امریکا سے وابستہ بعض عناصر کے ذریعے اہلِ سنت کے فقہا اور مفتیان سے ایرانی مسلمانوں کے خلاف کفر کے فتوے حاصل کرنے کی کوشش کی گئی۔بعض ایسے عناصر نے یہاں تک کہا کہ ’’ایرانی جس اسلام کی بات کرتے ہیں، وہ اس اسلام سے مختلف ہے جس کی ہم بات کرتے ہیں۔‘‘

 ان کا کہنا تھا کہ یہی عناصر، جو امریکا کے حامی اور اس کے اتحادی حکمرانوں کی پشت پناہی کرتے ہیں، مسلمانوں کے درمیان تفرقہ پیدا کرنے کے لیے کسی بھی الزام اور بہتان سے گریز نہیں کرتے اور اسلام دشمن قوتوں کے ساتھ تعلقات قائم کرتے ہیں۔

اس لیے مسلمانوں کو چاہیے کہ وہ ایسی سازشوں سے ہوشیار رہیں، باہمی اختلافات کو ہوا دینے والی کوششوں کو ناکام بنائیں اور اتحاد و اخوت کے ذریعے بیرونی تسلط اور استحصال کا مقابلہ کریں۔