اسلامی انقلاب کے بانی امام خمینی رہ نے اپنے ایک بیان میں کہا کہ اسلامی ممالک میں کیا کچھ ہو رہا ہے اور مسلمانوں کو استعمار، استحصال اور بیرونی طاقتوں کے تسلط میں رکھنے کے لیے کس نوعیت کی سازشیں کی جا رہی ہیں اور کون سے عناصر ان سازشوں کو ہوا دے رہے ہیں۔
ایسے وقت میں جب دنیا بھر کے مسلمان ایک دوسرے کے قریب آنے اور تمام اسلامی مذاہب کے درمیان باہمی مفاہمت کی طرف بڑھ رہے ہیں، اپنے ممالک کو بڑی طاقتوں کے چنگل سے آزاد کرانے کی کوششیں تیز ہورہی ہیں اور ایران سے مشرق و مغرب کی استبدادی طاقتوں کے اثر و رسوخ کو ختم کرنے کی راہ ہموار ہورہی ہے، بعض طاقتیں مسلمانوں کے درمیان اختلاف پیدا کرنے کی کوششیں کر رہی ہیں۔
اتحادِ کلمہ، اللہ تعالیٰ پر توکل اور اسلام و توحید کے پرچم تلے مسلمانوں کے اجتماع کے پیشِ نظر، بڑی طاقتوں نے اپنے حامی عناصر کو متحرک کیا ہے تاکہ ہر ممکن طریقے سے مسلمانوں میں تفرقہ پیدا کیا جائے، امتِ توحید اور اہلِ ایمان کو باہمی اختلاف و دشمنی میں مبتلا کیا جائے اور اپنے تسلط و استحصال کا راستہ مزید ہموار کیا جائے۔