حکومت کو عوام پر توجہ دینی چاہیے،عوام کو اقتدار میں شریک ہونا ہوگا

جماران خبر رساں ایجنسی ابنا کی رپورٹ کے مطابق، امام خمینیؒ کے پوتے حجت الاسلام والمسلمین سید حسن خمینی نے زور دیا ہے کہ کسی بھی نظامِ حکومت کی پائیداری کا انحصار عوامی رضامندی پر ہوتا ہے اور پالیسیوں و اقدامات کا مرکز و محور عمومِ عوام ہونے چاہئیں، نہ کہ مخصوص طبقات۔

انہوں نے یہ بات مجمع تشخیص مصلحت نظام کے صدر اور اراکین کی جانب سے امام خمینیؒ کے مزار پر تجدیدِ عہد کی تقریب سے خطاب کے دوران کہی۔ سید حسن خمینی نے کہا کہ آج دشمن ہر سمت سے دباؤ ڈال رہا ہے، لیکن امام خمینیؒ کی دی ہوئی سب سے بڑی تعلیم یہ ہے کہ جب قوم متحد ہو تو اس کی طاقت کئی گنا بڑھ جاتی ہے۔

انہوں نے کہا کہ امیرالمؤمنین حضرت علیؑ کے فرمان کے مطابق اگر عوام کی ناراضگی پیدا ہو جائے تو خواص کی رضامندی بھی باقی نہیں رہتی، جبکہ اگر عوام مطمئن ہوں تو اشرافیہ کی ناراضی بے معنی ہو جاتی ہے۔ ان کے بقول، حکومت کی اصل بنیاد عوامی اعتماد اور سماجی رضامندی ہے۔

سید حسن خمینی نے واضح کیا کہ تاریخ گواہ ہے کہ بہت سے افراد نے اسلامی جمہوریہ سے فائدہ اٹھایا، لیکن مشکل وقت میں نظام کے ساتھ کھڑے نہیں ہوئے۔ اس کے برعکس، وہی محروم اور مستضعف طبقات تھے جنہوں نے انقلاب کے نازک لمحات میں اس کا دفاع کیا۔

انہوں نے کہا کہ انقلاب اور شورش میں بنیادی فرق قربانی کا ہے؛ انقلاب ایثار مانگتا ہے جبکہ شورش میں صرف لوٹ مار ہوتی ہے۔ ان کے مطابق، انقلاب اسلامی کی کامیابی کی وجہ یہی تھی کہ عوام دل سے اس کے ساتھ تھے۔

سید حسن خمینی نے زور دیا کہ حکمرانی صرف معاشی معاملات تک محدود نہیں ہونی چاہیے بلکہ سیاسی اور سماجی رضامندی بھی اتنی ہی اہم ہے۔ انہوں نے کہا کہ عوام کو محض رعایا نہیں بلکہ اقتدار میں شریک سمجھا جانا چاہیے۔

انہوں نے اعتراف کیا کہ بعض شعبوں میں کمزوریاں موجود رہی ہیں اور انہی کمزوریوں سے دشمن فائدہ اٹھاتا ہے۔ ان کا کہنا تھا کہ ان مسائل کی درست تشخیص اور اصلاح کے لیے مجمع تشخیص مصلحت نظام ایک اہم اور مؤثر ادارہ ہے۔

آخر میں سید حسن خمینی نے امید ظاہر کی کہ ملکی ادارے خصوصاً مجمع تشخیص مصلحت نظام، آئندہ بھی محروم طبقات، عوامی مفادات اور سماجی انصاف کو اپنی پالیسیوں کا بنیادی محور بنائے رکھیں گے۔