اے خمینی! اے مدبر! اے امام انقلاب / تیرے رخ پر حسین ابن علی کی آب و تاب
السلام اے رہبر عالم عمل کے آفتاب / تو ہے اک زندہ حقیقت تو ہے اک زندہ کتاب
تو نے ہر کافر ملوکیت کو عریاں کردیا
تیرے اک ٹھو کرنے باطل کو پریشاں کردیا
آمریت اور شہنشاہی کو دی تو نے سزا / تو ہے روح اللہ اعظم، انقلابی رہنما
کشتی انسانیت کا آج تو ہے نا خدا / امن و اسلام کی وابستہ ہے تجھ سے بقا
حکمرانی تو نے قائم کی ہے وہ جمہور کی
جس سے عزت بڑھ گئی دہقان اور مزدور کی
السلام ایمان و تقوا کی ریاست کےامیر / ساری دنیا میں ہے اب تیری سیاست بے نظیر
کر نہیں سکتا ہے تیری فکر کو کوئی اسیر / اک نئی امت کا ہے تو غمگسار و دستگیر
کیا بگاڑے گا تیرا وہ بدزبان و بد لگام
جلد مرجائیگا اپنی موت خود ظالم صدام
ساری دنیا کے مسلمانوں کا ہے تو آسرا / تو علی کی ہے تمنا اور محمد کی دعا
سامراجوں کی دغا بازی ہے تیرے زیر پا / ہے شہنشاہی تیری ٹھوکر میں اے مرد خدا
تو امیر حریت ہے اور باکردار ہے
آج جو تیرا مخالف ہے وہی غدار ہے
تو نے بدکردار امریکہ کو دی بڑھ کر شکست / تو نے بخشی ہے نگاہ امتیاز نیک و زشت
نور اخلاق محمد سے بنی تیری سرشت / تو ہے روح اللہ نورانی ہے تیری سرنوشت
تو ہے مزدوروں کسانوں اور شریفوں کا امیر
تا ابد زندہ رکھے تجھ کو خداوند کبیر
نوع انساں کا مربی بے کسوں کا آشنا / تو ہے کعبہ کا محافظ آج اسے قبلہ نما
عالموں اور اہل تقوی کا ہے دل سے ہم نوا / اے خمینی تو ہے کل انسانیت کا رہنما
دہر کے محنت کشوں کا آج یہ ایمان ہے
امن و انسانیت کا رہنما ایران ہے
ہاں وہی ایران جس میں زندگی کا نور ہے / جو ازل سے کامراں ہے آج بھی منصور ہے
فارسیوں کی زمیں تہذیب سے معمور ہے / جس کے ہر ذرہ میں روشن اک چراغ طور ہے
پی نہیں سکتا وہاں اب کوئی بھی انساں شراب
فیض روح اللہ ہے دین محمد کا نصاب
سعدی و فردوسی و رومی و حافظ کا وطن / مجلس اقوام میں ہے آج میر انجمن
دہر میں کوئی نہیں ایران سا شیریں سخن / جس سے خالف ہے خزاں ایراں ہے وہ زندہ چمن
یہ شہیدوں کا ہے خرمن اور گلابوں کی زمیں
انفس و آفاق میں ایراں ہے فردوس بریں
زندہ انسانوں کے مأمن کو ہر انساں کا سلام / مرتفع ہو کیوں نہ روح اللہ اعظم کا مقام
عام ہوگا جلد خاور اب خمینی کا نظام / دین اور دنیا میں حاصل ہے شہیدوں کو دوام
مشرب انسانیت تحریک دینی زندہ باد
اب پکار اٹھے گا ہر انساں خمینی زندہ باد